मराठी भाषेला अभिजात भाषेचा दर्जा, अधिसूचना महाराष्ट्राला सुपूर्त

Kokan live digital news नवी दिल्ली, 8 जानेवारी 2025: मराठी भाषेला अभिजात भाषेचा मान मिळाल्याबाबतचा अधिसूचना आज केंद्रीय सांस्कृतिक मंत्री गजेंद्र सिंह शेखावत यांनी मराठी भाषा आणि उद्योग मंत्री उदय सामंत यांच्याकडे सुपूर्त केली. यावेळी साहित्य संस्कृती मंडळाचे अध्यक्ष सदानंद मोरे, अभिजात भाषा पाठपुरावा समितीचे अध्यक्ष डॉ. ज्ञानेश्वर मुळे, तसेच ज्येष्ठ साहित्यिक प्रदीप ढवळ उपस्थित होते. मराठी भाषेचं स्वप्न पूर्ण*
मंत्री उदय सामंत यांनी या ऐतिहासिक प्रसंगी आनंद व्यक्त करत म्हटलं, “११ वर्षांपूर्वी मराठी भाषेला अभिजात भाषेचा दर्जा मिळावा यासाठी प्रस्ताव पाठवला होता. तेव्हा मी मराठी भाषेचा राज्यमंत्री होतो, आणि आज जीआर स्वीकारताना कॅबिनेट मंत्री आहे, हा मोठा योगायोग आहे. महाराष्ट्राच्या प्राकृत भाषेला हा मान मिळाल्याचा अभिमान आहे.”

*मराठी भाषेच्या विकासासाठी निधीची मागणी*
या भेटीत मंत्री सामंत यांनी महाराष्ट्राच्या प्राकृत भाषेला निधीची अधिक उपलब्धता करून देण्याची विनंती केली. तसेच पुण्यात होणाऱ्या आगामी विश्व मराठी संमेलनाला केंद्रीय सांस्कृतिक मंत्री गजेंद्र शेखावत यांनी येण्याचं मान्य केलं असल्याची माहिती दिली. सामंत यांनी नमूद केलं, "दिल्लीच्या साहित्य संमेलनाच्या पाठी आम्ही उभे राहणार असून, त्याला कोणताही राजकीय रंग दिला जाणार नाही." 

*साहित्य संमेलनासाठी विशेष आर्थिक पाठबळ*
पुढील महिन्यात होणाऱ्या अखिल भारतीय मराठी साहित्य संमेलनाच्या पार्श्वभूमीवर अभिजात भाषेचा दर्जा हा महत्वाचा टप्पा ठरला आहे. मागील वर्षीपासून साहित्य संमेलनासाठी २ कोटी रुपयांची मदत देण्याचा निर्णय झाल्याची आठवणही मंत्री सामंत यांनी करून दिली.

दिल्लीतील मराठी शाळांसाठी प्रयत्न
दिल्लीतील मराठी शाळा सुदृढ करण्यासाठी महाराष्ट्र सरकार विशेष प्रयत्न करेल, असेही मंत्री सामंत यांनी सांगितले.

*पंतप्रधान मोदींना महाराष्ट्राचं आभार*
महाराष्ट्राच्या जनतेच्या वतीने पंतप्रधान नरेंद्र मोदी यांचे आभार मानत, मंत्री सामंत यांनी हा ऐतिहासिक निर्णय घेतल्याबद्दल धन्यवाद दिले.

मराठी भाषा आणि साहित्याचा सुवर्णयोग
“हा निर्णय आणि जीआर मिळणे हे आगामी साहित्य संमेलनासाठी भाग्याचा क्षण आहे. माझ्या हातून हे ऐतिहासिक काम पूर्ण होतंय याचा मला अभिमान आहे,” असं मंत्री सामंत यांनी नमूद केलं.